Samfés-Con 2026
Föstudaginn 16. janúar 2026 fór fram Samfés-Con í Sjálandsskóla í Garðabæ og var viðburðurinn afar vel sóttur. Alls tóku 240 starfsmenn félagsmiðstöðva og ungmennahúsa víðsvegar af landinu þátt í deginum sem var tileinkaður fræðslu, miðlun reynslu og innblæstri í ungmennastarfi.
Á dagskrá voru fjölbreyttar málstofur og smiðjur sem snertu ólík viðfangsefni í starfi með ungmennum. Þar á meðal voru málstofur sem fjölluðu um netheima og samfélagsmiðla ungmenna, með sérstakri áherslu á hvað mikilvægt er að hafa í huga þegar kemur að öryggi, vellíðan og forvörnum í stafrænu umhverfi.
Fulltrúaráð Samfés hélt áhugaverða málstofu um TikTok þar sem fjallað var um áhrif miðilsins og hverjar bestu leiðirnar eru til að ná til ungmenna á þeirra eigin forsendum. Samtökin 78 voru með gagnræðumálstofu þar sem fjallað var um hvernig bregðast megi við hatursorðræðu á skilvirkan hátt og hvernig bæta megi samskipti í ungmennastarfi. Amnesty var með málstofu sem tók fyrir mannréttindi og hvernig hægt er að flétta þau inn í daglegt starf með ungmennum.
Einnig kynnti Rannís Erasmus+ og ESC þau fjölmörgu tækifæri sem standa fólki til boða í gegnum alþjóðlegt samstarf, sjálfboðaliðastarf og verkefni erlendis. Fyrir þau sem vildu verklega nálgun bauðst þátttakendum að taka þátt í spilasmiðju, útieldun, auk hópeflis og leikja sem miða að því að styrkja tengslamyndun og samvinnu.
Samfés-Con undirstrikar mikilvægi þess að skapa vettvang fyrir fagfólk í ungmennastarfi til að koma saman, deila þekkingu og efla sig í starfi.
Starfsfólk og stjórn Samfés vilja sérstaklega þakka félagsmiðstöðinni Klakanum í Sjálandsskóla fyrir að hýsa okkur og halda viðburðinn og við þökkum öllum sem komu, tóku þátt og lögðu sitt af mörkum til að gera daginn bæði fræðandi og skemmtilegan.
