Emina Frljak er verkefnastjóri hjá Youth for Peace í Sarajevo, Bosníu og Herzegóvínu, en Youth for Peace hafa tekið þátt í mörgum Erasmus+ verkefnum. Emina er einnig meðlimur í alþjóðlega ungmennaráðinu hjá Religions for Peace og er stjórnarmeðlimur í European Interfaith Youth Network of Religions for Peace. Hún er með BA gráðu í uppeldis- og menntavísindum frá háskólanum í Sarajevo og MA gráðu í sama fagi, ásamt MA gráðu í þvertrúarlegum fræðum og friðaruppbyggingu. Hún hefur lengi starfað í friðaruppbyggingu bæði í Bosníu og erlendis.

Sérþekking hennar liggur í að skipuleggja verkefni, vinnustofur og námskeið, sem snúast um friðaruppbyggingu, takast á við fortíðina, trúarhefðir og þvertrúarlegt samtal (interreligious dialogue). Hún hefur sérstakan áhuga á menntun í þágu friðar, þvertrúarlegu námi og lýðræðisþáttöku en hún notar jafnan samfélagsmiðla til að miðla þekkingu sinni. Hún hefur einnig tekið þátt í verkefnum sem snúa að því að berjast gegn hatursorðræðu á netinu.

Bergþóra Kristín Ingvarsdóttir er sálfræðingur með meistaragráðu í klínískri sálfræði frá Háskólanum í Reykjavík. Hún hefur jafnframt lokið námi á sviði áfengis- og vímuefnamála og spilafíknar. Bergþóra hefur starfað sem sálfræðingur hjá SÁÁ, þar sem hún vann bæði með börnum sem eiga foreldra með fíknivanda og fullorðnu fólki sem glímir við vímuefnavanda eða spilafíkn. Hún hefur einnig sinnt fræðslu og meðferð ungs fólks og fullorðinna.

Í erindi sínu fjallar Bergþóra um veðmál unglinga og hvað starfsfólk sem vinnur með ungu fólki þarf að hafa í huga. Farið verður yfir einkenni spilavanda og spilafíknar, hvernig vandinn getur þróast og hvaða viðvörunarmerkjum mikilvægt er að vera vakandi fyrir. Einnig verður fjallað um hvernig hægt er að bregðast við og veita viðeigandi stuðning þegar grunur vaknar um að unglingur sé að þróa með sér vanda tengdan veðmálum eða öðrum fjárhættuspilum.

Guðmundur Ari Sigurjónsson er alþingismaður og formaður þingflokks Samfylkingarinnar. Hann er menntaður tómstunda- og félagsmálafræðingur og hefur víðtæka reynslu af málefnum barna og ungmenna. Hann hefur meðal annars starfað í félagsmiðstöðinni Selinu á Seltjarnarnesi, fyrst sem starfsmaður og síðar sem forstöðumaður, kennt tómstunda- og félagsmálafræði við Háskóla Íslands og starfað sem sérfræðingur í Evrópuáætlunum fyrir ungt fólk hjá Rannís. Þá sat hann um árabil í Æskulýðsráði ríkisins og hefur komið að útgáfu fræðslu- og handbókarefnis um æskulýðsstarf.

Guðmundur Ari hefur lengi beitt sér fyrir aukinni þátttöku og bættum tækifærum ungs fólks. Á Starfsdögum Samfés mun hann fjalla um vinnuna við fyrstu heildstæðu ungmennastefnu Íslands, markmið hennar og mikilvægi þess að sjónarmið og reynsla ungs fólks fái raunverulegt vægi við mótun stefnunnar.

Kári Sigurðsson er formaður Sameykis, stéttarfélags í almannaþjónustu. Hann hefur áralanga reynslu af félagsmiðstöðvastarfi og hóf störf í Félagsmiðstöðinni 111 í Breiðholti áður en hann tók við fullu starfi í Félagsmiðstöðinni við Hólmasel. Síðar starfaði hann sem verkefnastjóri forvarna hjá Reykjavíkurborg og hafði meðal annars umsjón með Flotanum, flakkandi félagsmiðstöð sem sinnir vettvangsstarfi með ungmennum.

Kári hefur jafnframt víðtæka reynslu af réttinda- og hagsmunabaráttu starfsfólks. Á Starfsdögum Samfés mun hann fjalla um miðgildi launavaxtar starfsfólks félagsmiðstöðva í samanburði við önnur störf hjá sveitarfélögum, þróun launakjara og mikilvægi þess að störf á vettvangi frítímans séu metin að verðleikum.

Gísli Ólafsson er sérfræðingur hjá mennta- og barnamálaráðuneytinu og hefur víðtæka reynslu af frístunda- og æskulýðsstarfi. Hjá ráðuneytinu vinnur hann að innleiðingu aðgerða í stefnu um Barnvænt Ísland sem tengjast þátttöku barna og ungmenna, meðal annars hagsmunamati barna og barnvænni samráðsgátt.

Áður starfaði Gísli um árabil hjá skóla- og frístundasviði Reykjavíkurborgar, meðal annars sem verkefnastjóri á fagskrifstofu frístundamála, forstöðumaður frístundaheimilis og frístundaleiðbeinandi. Hann hefur einnig starfað í Frístundaheimilinu Draumalandi og sem stjórnandi Félagsmiðstöðvarinnar 100og1. Gísli hefur því víðtæka reynslu af bæði stjórnsýslu og starfi með börnum og ungmennum.

Á Starfsdögum Samfés mun Gísli, ásamt Guðmundi Ara Sigurjónssyni, kynna vinnuna við ungmennastefnu Íslands. Þeir munu fjalla um markmið stefnunnar, stöðu vinnunnar og mikilvægi þess að sjónarmið og reynsla ungs fólks fái raunverulegt vægi við mótun hennar.