Árlegur viðburður fyrir starfsfólk félagsmiðstöðva og ungmennahúsa. Þar geta þeir sem vinna með ungu fólki komið og kynnt sér það nýjasta í afþreyingu og fræðslu sem er í boði fyrir fyrir ungt fólk. Þar sem eru kynningar í formi ör-fyrirlestra, kynningar frá aðilum sem eru með skemmtileg tæki sem hægt er að nota í starfi með ungu fólki. Einstakt tækifæri til að upplifa, læra og njóta.

Danskeppni Samfés hófst árið 2017 að frumkvæði ungs fólks og hefur síðan þá slegið í gegn sem einn af árlegum viðburðum Samfés. Keppnin veitir ungu fólki á landsvísu einstakt tækifæri til að koma fram og taka þátt í skapandi viðburði. 

Keppt er í tveimur aldursflokkum, 10–12 ára og 13–18 ára, og tveimur keppnisflokkum, einstaklings- og hópakeppni. Hópaatriði samanstanda af tveimur til sjö þátttakendum, en stærri hópar geta fengið undanþágu með leyfi. Öll atriði skulu vera frumsamin af þátttakendum sjálfum og skal hámarkslengd einstaklingsatriða vera 1:30 mínútur, en hámarkslengd hópaatriða 2:00 mínútur.

Skráning keppenda fer fram á mismunandi hátt eftir aldri. Keppendur á aldrinum 10–16 ára skrá sig í gegnum félagsmiðstöðvar og þarf starfsmaður félagsmiðstöðvar að fylgja þeim á keppnina. Keppendur sem eru 16 ára og eldri skrá sig í gegnum ungmennahús. Mikilvægt er að tónlistin (playback) fylgi með skráningu, annars telst skráningin ógild.

Hver félagsmiðstöð má skrá allt að fjögur atriði í keppnina, eitt hópaatriði og eitt einstaklingsatriði fyrir hvorn aldursflokk. Ungmennahúsum er heimilt að skrá tvö atriði, eitt hópaatriði og eitt einstaklingsatriði.

Mikið er lagt upp úr því að gera keppnina glæsilega og faglega í framkvæmd. Hún hefur notið mikilla vinsælda og hefur verið sýnd í beinu streymi hjá UngRúv, sem tryggir enn frekari útbreiðslu og þátttöku.

Stíll

Stíll er árleg hönnunarkeppni á milli félagsmiðstöðva þar sem keppt er í hárgreiðslu, förðun og fatahönnun út frá ákveðnu þema sem er ákveðið af ungmennaráði Samfés. Keppnin hefur oftast farið fram í nóvember ár hvert. Keppt hefur verið í Stíl undir formerkjum Samfés og ÍTK frá því á árinu 2000.

Markmið Stíls er að hvetja unglinga til listsköpunar og um leið gefa þeim aukin tækifæri til frumlegrar hugsunar og virkja sköpunarhæfileikana. Keppnin vekur jákvæða athygli á því hvað unglingar eru að gera á sviði sköpunar, gefur þeim kost á að koma hugmyndum sínum á framfæri og sýna afrakstur margra mánaða undirbúningsvinnu hópsins. Margir grunnskólar landins bjóða upp á Stíls valáfanga fyrir nemendur sína þar sem þeim býðst að vinna saman að hönnun sinni á skólatíma í samstarfi við félagsmiðstöð í heimabyggð.

Fyrirkomulag keppninnar er með þeim hætti að hóparnir, skipaðir 2-4 unglingum sem flest hafa tekið þátt í undankeppnum í sínum landshluta, fá tvær klukkustundir til þess að undirbúa módelið sitt fyrir sýninguna. Hóparnir skila einnig hönnunar möppu, sem útskýrir hugmyndina á bakvið hönnunina, með teikningum, efnisprufum, kostnaðarupplýsingum og ljósmyndum af flík, hári og förðun. Keppendur leggja mjög mikinn metnað í verkefnið og eru búningar hannaðir af hópunum fyrirfram í félagsmiðstöðvunum eða sem valáfangi í grunnskólum landsins.

Þema Stíls 2026 er:

Á tímum Viktoríu