Melkorka Ýr – Að efla samkennd
Melkorka Ýr kynnir meistaraverkefni sitt, handbók fyrir starfsfólk félagsmiðstöðva. Í henni eru hagnýt verkefni og aðferðir sem ætlað er að efla samkennd, félagsfærni og jákvæð samskipti meðal unglinga.

Rannís – European Solidarity Corps (ESC)
Fulltrúi Rannís kynnir European Solidarity Corps, evrópska áætlun fyrir ungt fólk sem styður við sjálfboðaliða- og samfélagsverkefni. Fjallað verður um þau tækifæri sem áætlunin býður ungu fólki, félagsmiðstöðvum og öðrum aðilum sem vilja hrinda samfélagsmiðuðum hugmyndum í framkvæmd.

Samfés – Sýndarsamráð ungmenna
Kynnt verður ný handbók Samfés fyrir ráðamenn, sveitarfélög og opinberar stofnanir um hvernig tryggja megi raunverulega þátttöku ungmenna í ákvarðanatöku. Handbókin hjálpar til við að greina á milli raunverulegs samráðs og sýndarsamráðs og veitir hagnýt verkfæri til undirbúnings, framkvæmdar og eftirfylgni.

Ólafur Bergur og Davíð – Besti vinur félagsmiðstöðvastarfsfólksins
Ólafur Bergur og Davíð frá Fjörheimum kynna hugmynd að nýju smáforriti sem ætlað er að styðja við og einfalda daglegt starf í félagsmiðstöðvum. Þeir segja frá hugmyndinni, þróunarferlinu og því hvernig appið gæti orðið gagnlegt verkfæri fyrir starfsfólk á vettvangi.

Ingibjörg Jóna – Að togast á milli tveggja heima
Ingibjörg Jóna kynnir meistararannsókn sína á hlutverki og ábyrgð stjórnenda félagsmiðstöðva. Rannsóknin varpar ljósi á hvernig stjórnendur takast á við fjölbreytt stjórnsýsluverkefni samhliða faglegu starfi og tengslum við ungmenni.